Der Weg ist das Ziel

 

Im Moment isch noch alles friedlisch,

Doch donn beginnt`s, tausendfach unnerschiedlisch.

Am Anfang glabscht, du spinnst,

bis du die Erkenntnis gewinnst

bei dir stimmt ebbes nimmer,

war des nur en kurze Glimmer?

oder weitet sich des ganze aus,

nä, do isch nix, do machsch´der nix draus!

 

Himmel, war jetzt schunn widder was,

hot misch do was gepackt, was issen das?

Ei Dunnerwetter noch e mol, stell dich net so dran,

sacht do moin Partner, ei moin Ehemann!

A, isch glab fast selbst, dass isch spinne,

jetzt geh isch zum Doc, der soll finne,

was misch do so unverhofft ereilt,

un scheinbar auf Dauer bei mir verweilt.

 

Isch hab moi´m Doc alles geschildert,

hab die unbekannte Erscheinunge reichlich bebildert.

De Doc, der gibt sich der Mühe recht viel,

er brummelt vor sich hie, ob isch wohl schiel?

Ne sach isch, des isch schunn mehr,

es muß e Unnersuchung beim Facharzt her!

 

Geknickt such isch den Neurologe uff,

hoffentlich hot der medizinisches Wisse druff,

damit der mer gleich sache kann,

is an der Geschichte was dran?

Medizinische Unnersuchungen aller Art, und teste

tut er moi Glieder, moin Kopp, den Beschde.

Als Ergebnis kummt not raus,

du muscht ach noch in`s Krongehaus.

  

Im Krongehaus die gleich Prozedur,

genau wie beim Nervearzt, nur

du kummscht ach noch in die Röhre dort,

des isch ken gemütliche Hort.

Die Besprechung der Ergebnisse,

zeigt dir deutlich, es isse,

die geheimnisvolle Kronkheit, mit dem Kürzel MS,

Multiple Sklerose, jetzt isch´s raus, jetzt wegscht´s!

 

Die Erläuterungen vum Doktor,

dringen wie durch Watt an moi Ohr,

was isch des? moi Nerve liegen blank,

bin isch denn tatsächlich krank?

Er macht´s verständlisch, für misch als Laie,

Un sacht: Die Kabel sinn verbrannt. Es gibt ke neie!

 

Um die Beweislage zu komplettiere,

soll isch  noch Nervewasser spendiere!

Damit festgestellt der Liquor-Wert,

des isch aber s´ledschde was ich gewehr.

Muß des alles erschd e mol verkrafte,

un die Wissenslücke schließe, die do klaffte.

 

Mit riesengroßer Spritze voraus,

kummen Doc und Pfleger. Welch ein Graus.

Die Nodel wird in de Rücke gestoße,

de Doc sucht die richtig Stell mit bloße

Händ, newer de Wirbelsäule,

mir is sauschlecht, un zum Heule!

 

De Liquor-Wert weist  unbestechlich

auf, moin Zustand und tatsächlich

  

Multiple Sklerose besteht, keine Frage,

damit muß ich lewe, alle Tage.

Wie soll das nur weitergehen,

tausend Frage sich im Kopfe drehen,

gibt es keine Lösung, keine Hilfe, nix,

ebbes wu wirkt, gonz fix?

 

Medikamente gibt es derer viele,

isch merk schon, wie isch noch´m Beste schiele,

doch keine Wunderwurzel, wie Alraune,

sagt der Doc is dabei, un isch staune,

wird doch geforscht schunn Jahre zig,

un es hot noch net gemacht, klick

für eine Pille mit der man zaubert

und die Kronket e´fach raubert?

 

Alles in mir war voller Unruhe,

was isch wohl am beste tue.

Soll isch misch zu haus verkrieche

und langsam vor misch hinsieche?

Nein, sag ich mir mit aller Energie,

zur Selbsthilfegruppe in Speyer, do muscht du hie!

 

Dort sin liewe, nette Leit,

die waren bestimmt - wie du - soweit,

henn sich enorm zusammegerisse

un der Kronkheit was gesch.....

treffen sich regelmäßig monatlich im Lokal,

un sin gebliwwe, gonz normal!!!!!!!!!

 

 

Erich Peter Kuhn©

Redaktionell ergänzt im Juli 2014